2000,ᓂ ᓂᕆᐅᑦᓯᐊᕐᓂᖅ ᐊᒻᒪ ᐊᓯᔾᔨᖅᐸᓪᓕᐊᓂᖅ
ᐊᕐᕌᒍᓂ 2000-ᒥᒃ ᓴᖅᑭᓚᐅᖅᑐᑦ ᓄᑖᑦ ᑎᑎᕋᐅᔭᖅᑏᑦ ᐃᓚᒋᔭᐅᓯᓪᓗᑎᒃ ᑎᑎᖅᑐᒐᕐᕕᒻᒧᑦ. ᒪᑐᐃᖓᑎᑦᓯᓂᒃᑯᑦ ᑎᑎᖅᑐᒐᕐᕕᒻᒥᒃ, ᓱᒃᑲᓂᖅᓴᒥᒃ ᐱᕙᓪᓕᐊᓂᖅᓴᐅᒍᑕᐅᔪᓐᓇᓚᐅᖅᑐᖅ ᓯᕗᓪᓕᕐᓂᑦ ᖁᓕᓂᑦ ᐊᕌᒍᓂᑦ, ᖃᐃᖅᑯᔨᖏᓐᓇᐅᔭᖅᓱᑎᓪᓗ ᖃᓪᓗᓈᑦ ᓄᓇᖓᓂᑦ ᑎᑎᕋᐅᔭᖅᑎᒻᒪᕆᓐᓂᒃ ᐅᑭᐅᖅᑕᖅᑐᒧ ᐱᓕᕆᖃᑎᖃᖅᓱᑎᒃ ᐃᓄᓐᓂᒃ ᑎᑎᕋᐅᔭᖅᑎᓂᒃ. ᐊᒻᒪᓗ, ᐊᑲᐅᓈᕐᓂᖅᓴᒥᒃ ᐱᓕᕆᖃᑎᒌᒐᓱᐊᕐᓂᖃᓕᓚᐅᖅᓯᒪᔪᑦ ᓄᓇᕗᒻᒥ ᓯᓚᑦᑐᓴᕐᕕᒻᒥ ᓴᓇᓐᖑᐊᕐᓂᕐᒧᑦ ᐃᓕᓐᓂᐊᕐᕕᒻᒥᒃ ᐃᖃᓗᓐᓂ ᐊᒻᒪ ᐃᓄᐃᑦ ᓴᓇᐅᒐᓕᕆᓂᕐᒧᑦ ᑲᑐᔾᔨᖃᑎᒌᖓᓂᒃ, ᐋᑐᕗᐊᒥ. ᑕᒪᒃᑯᐊ ᐱᔾᔪᑎᒋᓪᓗᒋᑦ ᐊᒻᒪ ᐊᓯᖏᑦ ᐊᔅᓱᕈᕈᑕᐅᓯᒪᔪᑦ, ᐊᒥᓱᕈᕐᓂᖅᓴᐅᓚᐅᖅᓯᒪᔪᑦ ᑎᑎᕋᐅᔭᖅᑏᑦ ᑭᓐᖓᕐᓂᑦ, ᑕᒪᕐᒥᒃ ᒪᒃᑯᑦᑐᑦ ᐊᒻᒪ ᐃᓄᑐᖃᐅᓂᖅᓴᐃᑦ, ᓴᖅᑭᑎᕆᕙᓪᓕᐊᓕᖅᓱᑎᒃ ᑲᒪᓇᖅᑐᓂᒃ, ᐃᖅᑲᐃᒍᑎᓂᒃ ᐊᒻᒪ ᓴᓇᑦᓯᐊᖅᓯᒪᔪᒻᒪᕆᐊᓗᓐᓂᒃ ᑎᑎᖅᑐᒐᕐᓂᒃ. ᐅᑯᐊᖑᓚᐅᖅᑐᑦ ᑎᑎᕋᐅᔭᖅᑎᐅᓕᓵᖅᑐᑦ ᐊᓂᕐᓂᖅ ᕌᒌ, ᒥᓕᐊ ᔮ, ᓂᖏᐅᑯᓗᒃ ᑏᕕ, ᔫᑕᐃ ᑐᓄ, ᐸᐱᐊᕋ ᑐᑭᖅᑭ, ᐋᓂ ᐳᑐᒍᖅ, ᐊᒻᒪ ᑎᒻ ᐱᑦᓯᐅᓛᖅ. ᐅᑯᐊ ᑎᑎᕋᐅᔭᖅᑎᐅᖏᓐᓇᐅᔭᖅᑐᑦ (ᓲᕐᓗ ᓱᕕᓇᐃ ᐊᓲᓇ, ᐊᕐᓇᖅᑯ ᐋᓯᕙᒃ, ᖃᕙᕙᐅᖅ ᒪᓄᒥ ᐊᒻᒪ ᖃᖁᓪᓗ ᓵᒋᐊᖅᑐᖅ) ᐱᓕᕆᖃᑕᐅᓂᖅᓴᐅᓕᓚᐅᖅᑐᑦ ᑎᑎᖅᑐᒐᕐᕕᒻᒥ ᐊᒻᒪ ᓴᖅᑭᑎᑦᓯᖏᓐᓇᐅᔭᖅᓱᑎᒃ ᓯᕗᓕᐅᖅᑎᐅᑦᓯᐊᕐᓂᕐᒥᒃ. ᐃᓄᑐᖃᐅᓂᖅᓴᐃᑦ ᑎᑎᕋᐅᔭᖅᑎᑦ (ᐅᑯᐊ ᕿᓐᓄᐊᔪᐊᖅ ᐋᓯᕙᒃ ᐊᒻᒪ ᐅᖂᑕᖅ ᒥᑭᒐᖅ) ᒪᑭᒪᑎᑦᓯᖏᓐᓇᐅᔭᕐᓂᒃᑯᑦ ᑎᑎᖅᑐᒐᕐᕕᒻᒥᒃ ᓴᖅᑭᑎᑦᓯᖏᓐᓇᐅᔭᕆᐊᖅ ᐱᐅᔪᒻᒪᕆᐊᓗᓐᓂᒃ ᑎᑎᖅᑐᒐᕐᓂᒃ.
Brief Case Pootoogook, Annie, 2005, CD 2005-001, Photo © CMC
ᑎᑎᖅᑐᒐᓕᐅᕐᓂᖅ ᐊᓪᓕᕋᓂᒃ ᓴᓇᓐᖑᐊᖅᓯᒪᔪᓂᒃ ᐊᑐᕐᓗᓂ ᐊᐅᓚᑕᐅᓚᐅᖅᓯᒪᔪᖅ ᐱᑦᓯᐅᓛᖅ ᓂᕕᐊᖅᓯᒧᑦ ᐊᒻᒪ ᓂᕕᐊᖅᓯ ᖁᕕᐊᓇᖅᑐᓕᐊᕐᒧᑦ, ᐊᔅᓱᕈᕈᑎᖃᓚᐅᖅᑑᓐᓄᑦ ᐊᑐᖅᓱᑎᒃ ᐱᑐᐃᓐᓇᐅᖏᑦᑐᓂᒃ ᓴᖅᑭᑎᕆᒍᑎᓂᒃ ᑎᑎᖅᑐᒐᕐᓂᒃ. ᐊᔾᔨᒌᓐᖏᑦᑐᓂᒃ ᐊᒥᐊᓕᓐᓂᒃ, ᓴᕕᕋᔭᕐᓂᓪᓗ ᐊᑐᕐᓂᒃ, ᐊᒻᒪ ᓵᓃᓯᒃᑯᑦ ᐸᐃᑉᐹᖓᒍᑦ ᐊᒻᒪ ᐊᓪᓕᕋᕐᓂᑦ ᐊᒥᐊᕐᓂᖅ ᓴᖅᑭᒋᐊᒃᑲᓐᓂᓚᐅᖅᓯᒪᔪᖅ ᑎᑎᖅᑐᖓᕐᕕᒻᒥ, ᐊᒻᒪ ᓴᖅᑭᑎᑦᓯᒍᑕᐅᓪᓗᓂ ᓄᑖᓂᒃ ᑎᑎᖅᑐᒐᕈᓯᕐᓂᒃ ᓲᕐᓗ ᕿᓐᓄᐊᔪᐊᖅ ᐋᓯᕙᒻᒧᑦ. ᐊᒻᒪ ᑎᑎᖅᑐᒐᕐᓂᒃ ᓴᖅᑭᑎᕆᔨᐅᓪᓗᑎᒃ ᐊᓪᓕᕋᕐᓂᒃ ᓴᓇᓯᒪᔪᓂᒃ ᐊᑐᕐᓂᒃᑯᑦ ᐅᑯᐊᖑᓚᐅᖅᑐᑦ ᖃᕙᕙᐅᖅ ᒪᓄᒥ ᐊᒻᒪ ᕿᐊᑦᓱᒃ ᓂᕕᐊᖅᓯ, ᐊᕐᓇᖅᑯ ᐋᓯᕙᒃ ᐊᒻᒪ ᐃᒪᑐᓗ ᐋᒋᐊᖅ.
Family of Eight Pitsiulak, Tim, 2008, CD 2008-034, Photo © CMC
2005-ᒥ ᕿᑭᖅᑖᓘᑉ ᐅᐊᓕᓂᖓᓂ ᐃᓄᐃᑦ ᑯᐊᐸᖓ ᐱᓕᕆᖃᑎᖃᕆᐊᓕᓚᐅᖅᓯᒪᔪᑦ Atelier GF-ᓄᖑᓂᕋᖅᑕᐅᔪᓂᒃ — ᑐᕌᓐᑐᒥᐅᑕᓂᒃ, ᑲᑐᔾᔨᖃᑎᒌᖑᓪᓗᑎᒃ ᑎᑎᖅᑐᒐᕐᓂᒃ ᓴᖅᑭᑎᕆᕕᒻᒥ — ᓴᖅᑭᑎᕆᒋᐊᖅ ᑎᑎᕋᐅᔭᖅᓯᒪᔪᑦ ᐅᓄᖅᑎᑦᓱᒋᑦ, ᐅᕝᕙᓘᓐᓃᑦ ᖃᓪᓗᓈᖅᑕᒃᑯᑦ ᑎᑎᕋᐅᔭᕐᓂᖅ ᑭᓐᖓᕐᒥ ᑎᑎᕋᐅᔭᕐᓂᒃᑯᑦ. ᖃᓪᓗᓈᖅᑕᓂᒃ ᐊᑐᕐᓗᑎᒃ ᑎᑎᕋᐅᔭᖅᑕᐅᓂᑯᐃᑦ 2009-ᒥ ᐊᕐᕌᒍᑕᒫᖅᓯᐅᑎᑦ ᑲᑎᖅᓱᖅᑕᐅᓯᒪᔪᑦ, ᐱᕕᒃᓴᖃᕈᑕᐅᒋᐊᓪᓚᑦᓯᒪᔪᑦ ᑎᑎᖅᑐᒐᖅᑎᓄᑦ ᐊᓯᖏᓐᓂᑦᑕᐅᖅ ᓴᖅᑭᑎᕆᒋᐊᖅ ᑎᑎᖅᑐᒐᕐᓂᒃ.
ᒪᒃᑯᓐᓂᖅᓴᐃᑦ ᑭᓐᖓᕐᒥᐅᑦ ᑎᑎᖅᑐᒐᖅᑏᑦ ᐆᒃᑐᕋᖃᑦᑕᖅᓯᒪᔪᑦ ᐊᔾᔨᒌᓐᖏᑦᑐᓂᒃ ᐊᒻᒪ ᑕᐃᑦᓱᒪᓂᕐᒥᑦ ᐊᔾᔨᒋᔭᐅᓐᖏᑦᑐᓂᒃ ᐊᕐᕌᒍᑕᒫᑦ ᑲᑎᖅᓱᐃᕙᑦᓱᑎᒃ. ᐊᒥᓱᒻᒪᕆᓐᓂᒃ ᐊᔾᔨᓐᖑᐊᓕᐅᖃᑦᑕᖅᓯᒪᔪᑦ ᐅᓪᓗᑕᒫᑦ ᐃᓅᓯᕆᔭᐅᔪᑦ ᒥᒃᓵᓄᑦ ᐅᑭᐅᖅᑕᖅᑐᒥ — ᐃᓚᒌᓐᖑᐊᑦ ᓂᓐᓂᐅᕋᐅᑎᔪᑦ ᐃᑭᒪᓪᓗᑎᒃ ᓄᓇᑐᐃᓐᓇᕐᒥ ᐃᖏᕐᕋᐅᑎᒃᑯᑦ, ᑎᑎᕋᐅᔭᕐᕕᒋᓯᒪᑦᓱᑎᒃ ᓇᐅᒃᑯᓕᒫᖅ, ᐊᒻᒪ “ᐊᔾᔨᓕᐅᕆᓪᓗᑎᒃ” ᖃᓂᓈᖅᓯᒪᒻᒪᕆᑦᑐᓂᒃ ᓱᓇᕐᕈᑎᓂᒃ ᐊᒻᒪ ᐃᓄᖏᓐᓂᒃ — ᑭᓐᖓᕐᓂᑦ ᑎᑎᖅᑐᒐᖅᑏᑦ ᑎᑎᕋᐅᔭᖃᑦᑕᖅᓯᒪᔪᑦ ᐊᑯᓂᓂᑕᕐᓂᒃ ᑭᖑᓂᕆᓕᖅᑕᑎᓐᓂ, ᐊᓯᖏᓐᓂᓪᓗ ᑕᑯᓐᓇᓐᖑᐊᖅᑕᒥᓂᒃ, ᐊᒻᒪ ᓲᕐᓗ ᑐᑭᓯᐅᒪᑎᑦᓯᓂᓴᐅᓂᖅᓴᐅᒐᓱᐊᖅᑐᑎᒃ ᑭᒃᑯᑐᐃᓐᓇᕐᓂᒃ — ᑕᑯᑦᑕᐅᓕᓵᖅᑐᓂᓪᓗ ᑎᑎᖅᑐᒐᖏᓐᓂᒃ. ᐃᒃᐱᒍᓱᒍᓐᓇᐃᕈᑎᒋᓚᐅᖅᓯᒪᓇᒋᑦ ᐱᐅᔪᐊᓘᓂᖏᓐᓂᒃ ᐊᒻᒪ ᑎᑎᕋᐅᔭᑦᓯᐊᖅᓯᒪᔪᒻᒪᕆᐅᓂᖏᓐᓂᒃ, ᐊᒥᓱᑦ ᐃᓄᑐᖃᐅᓂᖅᓴᐃᑦ (ᓲᕐᓗ ᑭᓐᖑᐊᑦᓯᐊᖅ ᐳᑐᒍᖅ, ᐲᑦᑕᓘᓯ ᓴᐃᓚ ᐊᒻᒪ ᐅᖂᑕᖅ ᒥᑭᒐᖅ) ᐊᑐᓚᐅᕐᒥᔪᑦ ᓂᕆᐅᓇᓐᖏᑦᑐᓂᒃ ᐊᑐᕆᐊᓕᓐᓂᒃ.
Gulls and Ravens Ashevak, Kenojuak, 2001, CD 2001-013, Photo © CMC
ᐊᕐᕌᒍᓂ ᖁᓕᓂ, ᐊᕐᕌᒍᑕᒫᑦ ᑲᑎᖅᓱᖅᑕᐅᕙᑦᑐᑦ ᑕᐃᒪᐃᖏᓐᓇᖅᓯᒪᔪᑦ, ᓴᓂᐊᓃᐸᑦᓱᑎᒃ 30 ᑎᑎᖅᑐᒐᐃᑦ (ᐱᖃᓯᐅᑎᓇᒋᑦ ᐃᒻᒥᒃᑯᑦ ᑮᓇᐅᔭᓕᐅᖅᑎᑕᐅᓯᒪᔪᑦ), ᐅᓄᕐᓂᖃᖅᑐᑦ ᑎᑎᖅᑐᒐᖅᑏᑦ 12-ᓂᒃ — ᑕᒪᕐᒥᒃ ᒪᒃᑯᑦᑐᑦ ᐊᒻᒪ ᐃᓐᓇᐅᓂᖅᓴᐃᑦ — ᑲᑎᖅᓱᐃᕕᐅᓯᒪᔪᑦ. ᓴᖅᑭᑎᕆᖁᓪᓗᒋᑦ ᓄᑖᓂᒃ ᐅᕝᕙᓘᓐᓃᑦ ᐆᒃᑐᕋᖅᑕᐅᓚᐅᖅᓯᒪᓐᖏᑦᑐᓂᒃ, ᕿᑭᖅᑖᓘᑉ ᐅᐊᓕᓂᖓᓂ ᐃᓄᐃᑦ ᑯᐊᐸᖓᑎᒍᑦ ᓴᖅᑭᑎᑦᓯᓕᓚᐅᖅᓯᒪᔪᑦ “ᐅᐱᕐᖔᕐᒥ ᓴᖅᑭᑕᐅᕋᑖᖅᑐᓂᒃ,” ᐅᓄᕋᑎᒃ ᑲᑎᖅᓱᖅᑕᐅᓯᒪᔪᓂᒃ ᑎᑎᖅᑐᒐᕐᕕᒻᒥ ᐃᓱᒪᖏᓐᓂᒃ.
ᐊᕐᕌᒍᑦ ᖁᓖᑦ ᐊᓂᒍᓕᖅᑎᓪᓗᒋᑦ, ᓯᓚᕐᔪᐊᕐᒥ ᑐᓴᒐᒃᓴᓂᐊᖅᑏᑦ ᐃᒃᐱᒋᔭᖃᒻᒪᕆᓕᓚᐅᖅᓯᒪᔪᑦ ᕿᓐᖓᕐᒥᐅᑦ ᑎᑎᖅᑐᒐᕐᕕᖓᓂᒃ ᖁᕕᐊᓱᒍᑎᖃᖅᑎᓪᓗᒋᑦ ᐊᕐᕌᒍᓂ 50-ᓂ ᓴᖅᑭᓯᒪᓕᕐᓂᖏᓐᓂᒃ 2009-ᒥ, ᑕᑯᒃᓴᐅᑎᑦᓯᖃᑦᑕᖅᓱᑎᒃ ᐊᒻᒪ ᐅᓄᖅᓯᑎᑦᓯᕙᓪᓕᐊᓂᖏᑎᒍᑦ ᑎᑎᖅᑐᒐᕐᓂᒃ. ᑕᑯᓐᓇᖅᑐᒋᑦ ᓱᓕ ᐊᕐᕌᒎᓂᐊᖅᑐᑦ 50, ᔨᒥ ᒫᓂᖕ ᑎᑎᕋᓚᐅᖅᑐᖅ ᐃᒫᒃ "ᐊᔅᓱᕈᕐᓂᖏᑎᒍᑦ ᓄᑖᑦ ᑎᑎᖅᑐᒐᖅᑏᑦ ᑲᔪᓯᕙᓪᓕᐊᓂᐊᖅᑐᑦ ᐊᒻᒪ ᐃᒻᒥᒃᑯᑦ ᐊᖅᑯᑎᓕᐅᕐᓗᑎᒃ ᓯᕗᓂᒃᓴᒥᓄᑦ."