1960-ᖏᓐᓂ ᓴᖅᑭᑎᑦᓯᓂᖅ ᑐᓐᖓᕕᖓᓂᒃ
Untitled; walrus Parr, 1962, CD 1962-056, Photo © CMC
1960-ᖏᓐᓂ ᕿᑭᖅᑖᓘᑉ ᐅᐊᓕᓂᐊᓂ ᐃᓄᐃᑦ ᑯᐊᐸᒃᑯᖏᑕ ᑲᑎᒪᔨᖏᑦ ᐃᖅᑲᓇᐃᔭᖅᑎᑖᓚᐅᖅᓯᒪᔪᑦ ᑎᐅᕋᓐᔅ ᕋᐃᐊᓐᒥᒃ1, ᐃᓕᓐᓂᐊᕇᖅᓯᒪᔪᒥᒃ ᐋᓐᑎᐊᕆᐅ ᓯᓚᑦᑐᓴᕐᕕᖓᓂ ᑎᑎᖅᑐᒐᕐᓂᕐᒧᑦ, ᓴᓇᓐᖑᐊᕐᕕᒻᒥ ᐊᐅᓚᑦᓯᔨᐅᓂᐊᖅᑎᓪᓗᒍ ᐊᒻᒪ ᓄᓇᓕᓐᓂ ᑎᑎᖅᑐᒐᕐᓂᐅᑉ ᒥᒃᓵᓄᑦ ᐃᑲᔪᖅᑎᐅᓂᐊᖅᑎᓪᓗᒍ. 1960-ᒥ ᐊᒻᒪ 1961-ᒥ ᑯᐊᐸᒃᑯᑦ ᒪᑭᑦᑐᒻᒪᕆᐅᓚᐅᖅᓯᒪᔪᑦ, ᑲᑎᖅᓱᐃᓂᖓᓗ ᑲᔪᓯᔪᒻᒪᕆᐅᓪᓗᓂ 65-ᓂᒃ ᐊᒻᒪ 83-ᓂᒃ ᐅᓄᖅᑎᒋᔪᓂᒃ ᐊᔾᔨᒌᓐᖏᑦᑐᓂᒃ ᓴᖅᑭᑎᕆᓪᓗᑎᒃ ᐊᒻᒪ ᑎᑎᖅᑐᒐᖅᓯᒪᔪᓂᒃ ᐊᒥᓱᕈᖅᑎᑦᓯᕚᓪᓕᖅᓱᑎᒃ ᐊᕐᕌᒍᑕᒫᑦ. 1961-ᒥ ᕋᐃᐊᓐ ᑲᔪᖏᖅᓱᐃᓕᓚᐅᖅᓯᒪᔪᑦ ᐊᑐᕆᐊᖅ ᓯᕗᓪᓕᖅᐹᒥ ᓴᕕᕋᔭᒃᓴᒥᒃ ᐊᓪᓕᕋᖃᕆᐊᖅ ᑎᑎᖅᑐᒐᕐᕕᒃᓴᒥᒃ ᓴᓇᓪᓗᒍ ᐊᒻᒪ ᑎᑎᖅᑐᒐᕐᓂᖅ ᕿᑦᓱᑦᑎᑐᑐᑦ—ᑎᑎᖅᑐᒐᕐᕕᖃᓪᓚᑦᑖᕈᓐᓇᕐᓂᖓᓂᒃ ᓴᓇᓐᖑᐊᖅᑏᑦ ᑎᑎᖅᑐᒐᖅᑏᑦ ᓴᕕᕋᔭᒥᒃ ᐊᑐᕐᓗᑎᒃ ᐊᓪᓕᕋᕐᒥᒃ. ᐊᕐᕌᒍᒐᓴᓐᓂ ᖁᓕᓂ, ᕋᐃᐊᓐ ᖃᐃᖅᑯᔨᖃᑦᑕᖅᓯᒪᔪᖅ ᐊᒥᓱᓂᒃ ᖃᓪᓗᓈᑦ ᓄᓇᖓᓂᕐᒥᐅᓂᒃ ᑎᑎᕋᐅᔭᖅᑎᒻᒪᕆᓐᓂᒃ ᑭᓐᖓᐃᑦ ᓴᓇᓐᖑᐊᕐᕕᖓᓄᑦ ᖃᐃᖅᑯᔭᐅᑐᐃᓐᓇᖅᑐᑦ ᐊᒻᒪ ᐃᑲᔪᖅᑎᒋᔭᐅᓪᓗᑎᒃ ᐱᓕᕆᖃᑎᖃᕐᓂᒃᑯᑦ ᐃᓄᓐᓂᒃ ᑎᑎᕋᐅᔭᖅᑎᓂᒃ, ᕿᒥᕐᕈᖃᑎᒌᑦᓱᑎᓪᓗ ᐊᔾᔨᒌᓐᖏᑦᑐᓂᒃ ᐱᓕᕆᔾᔪᓯᓂᒃ, ᐱᓇᓱᐊᖃᑎᒌᑦᓱᑎᓪᓗ ᐊᒻᒪ ᓴᖅᑭᑎᕆᓪᓗᑎᒃ ᐅᓪᓗᒥ ᓱᓕ ᐊᑐᖅᑕᐅᔪᓂᒃ.
Summer Tent of Old Ashoona, Pitseolak, 1969-1970,
CD 1969-008 i, Photo © CMC
ᐊᒥᓱᑦ ᖃᐅᔨᒪᔭᐅᓂᖃᒻᒪᕆᑦᑐᑦ ᐊᕐᓇᐃᑦ ᑭᓐᖓᕐᒥᐅᑦ ᓴᖅᑭᐅᕋᖅᓯᒪᔪᑦ ᓲᖑᔪᓂᒃ ᑎᑎᕋᐅᔭᖅᑏᑦ, ᐊᔾᔨᐅᓐᖏᑦᑐᓂᒃ ᑎᑎᕋᐅᔭᒃᑲᓂ ᐃᓚᖏᑦ ᖃᐅᔨᒪᔭᐅᓗᐊᕈᑎᓖᑦ ᐅᑯᐊᖑᓪᓗᑎᒃ — ᕿᓐᓄᐊᔪᐊᖅ ᐋᓯᕙᒃ, ᐱᑦᓯᐅᓛᖅ ᐊᓲᓇ, ᓘᓯ ᕿᓐᓄᐊᔪᐊᖅ ᐊᒻᒪ ᓇᐹᑦᓯ ᐳᑐᒍᖅ, ᐊᓯᖃᕐᒥᓱᑎᒃ. ᐊᒥᓱᑦ ᑎᑎᕋᐅᔭᖅᓯᑎᐊᓗᐃᑦ ᐊᖑᑏᑦ ᐃᑲᔪᖅᓯᒪᒋᕗᑦ ᐃᓕᐅᖅᑲᐃᓂᕐᒧᑦ ᓴᓇᓐᖑᐊᕐᕕᒻᒧᑦ, ᐅᑯᐊ ᕿᐊᑦᓱᒃ, ᐸᓪᓗᖅ ᐳᓪᓚᑦ ᐊᒻᒪ ᐹᕐ. ᐊᑐᕐᓂᓕᒫᑲᓴᖏᓐᓂ 1960-ᓂᑦ, ᓴᓇᕕᒻᒥ ᑎᑎᕋᐅᔭᖅᑎᒻᒪᕇᑦ ᐊᑐᖃᑦᑕᓚᐅᖅᑐᑦ ᐱᖓᓲᔪᖅᑐᓂᒃ (6) ᑎᑎᖅᑐᒐᕐᓂᒃ ᓴᖅᑭᑎᔨᓂᒃ ᑎᑎᕋᐅᔭᖅᓯᒪᔭᖏᓐᓂᒃ ᐅᒃᑯᓯᒃᓴᒥᑦ ᓴᓇᓐᖑᐊᖅᓯᒪᔪᓂᒃ ᐊᓪᓕᕋᖃᖅᓱᑎᒃ ᑎᑎᖅᑐᒐᑎᒍᑦ ᐊᒻᒪ ᐊᒥᐊᖅᓯᒪᔪᓂᒃ ᓴᖅᑭᑎᕆᓂᒃᑯᑦ - ᐅᓱᐃᑦᑐᖅ ᐊᐃᐱᓕ, ᕿᓐᓄᐊᔪᐊᖅ ᐳᑐᒍᖅ, ᐃᔨᕙᑦᓗᒃ ᐳᑐᒍᖅ, ᐊᐃᐅᓛ ᑭᓐᖑᐊᑦᓯᐊᖅ, ᓗᒃᑕ ᕿᐊᑦᓱᒃ ᐊᒻᒪ ᑎᒧᑎ ᐅᑐᖅᑭ.
Strange Beasts Kopapik, Simeonie, 1963, CD 1963-069, Photo © CMC
ᐃᓱᓕᓕᖅᑎᓪᓗᒋᑦ 1960, ᓴᓇᓐᖑᐊᕐᕕᒻᒥ ᓇᓗᓇᐃᔭᐃᓚᐅᖅᓯᒪᔪᑦ ᑎᑎᖅᑐᒐᖅᑎᓂᒃ ᐃᑲᔪᐃᓐᓇᐅᔭᖅᓯᒪᔪᓂᒃ ᑭᓐᖓᕐᓂᑦ ᑎᑎᖅᑐᒐᓕᕆᓂᕐᒧᑦ. ᑎᑎᖅᑐᒐᕐᓂᒃ ᓴᖅᑭᑎᕆᔩᑦ ᐋᖅᑭᑦᓯᐊᕙᓪᓕᐊᑐᐃᓐᓇᓚᐅᖅᑐᑦ ᐊᒻᒪ ᖃᐅᔨᒪᓂᖃᑦᓯᐊᓕᖅᓱᑎᒃ ᐊᒥᓱᓂᒃ ᓴᓇᓐᖑᐊᕈᓯᕐᓂᒃ/ᑎᑎᖅᑐᒐᕈᓯᕐᓂᒃ—ᐅᒃᑯᓯᒃᓴᒥᒃ ᑎᑎᖅᑐᒐᓕᐅᕈᓯᓕᕆᓂᕐᒥᒃ, ᑎᑎᖅᑐᒐᕈᓯᒥᒃ ᓇᕿᑦᑕᐅᒻᒥᒃ ᐊᑐᖅᑐᒥ, ᐊᒻᒪ ᕿᑦᑐᖃᕐᓂᒃᑯᑦ ᓴᓇᓐᖑᐊᕐᓂᖅ —ᐊᒻᒪ ᐃᓛᓐᓂᒃᑯᑦ ᓄᑖᓂᒃ ᐆᒃᑐᕋᖅᐸᑦᓱᑎᒃ, ᓲᕐᓗ ᑎᑎᕋᐅᔭᕐᓂᖅ ᓵᑦᑐᓂᒃ ᐊᑐᖅᑐᑎᒃ 1964-1965-ᒥ. ᐊᒻᒪ ᓴᓇᓐᖑᐊᕐᕕᒻᒥ ᐆᒃᑐᕋᓚᐅᖅᓯᒪᔪᑦ ᓂᐅᕕᐊᒃᓴᓕᐅᕐᓂᕐᒥᒃ ᐊᒡᒐᒻᒧᑦ ᐊᒥᐊᖅᓯᒪᔪᓂᒃ ᖃᓪᓗᓈᖅᑕᓂᒃ, ᐊᑐᖅᑕᐅᓐᖏᓐᓂᖅᓴᐅᓕᑕᐃᓐᓇᓚᐅᖅᑐᑦ ᐊᑐᖅᑐᑐᖃᐅᓕᕐᑎᓪᓗᒋᑦ 1960-ᓂᑦ.
The Enchanted Owl Ashevak, Kenojuak, 1960, CD 1960-024 ii, Photo © CMC
ᐊᕐᕌᒍᓂ ᖁᓕᓂ, ᑎᑎᖅᑐᒐᕐᕕᒻᒥ ᓴᖅᑭᑎᑦᓯᓚᐅᖅᓯᒪᔪᑦ 60 ᐊᒻᒪ 90 ᐊᑯᓐᓂᖏᓐᓃᑦᑐᓂᒃ ᐊᔾᔨᒌᓐᖏᑦᑐᓂᒃ ᑎᑎᖅᑐᒐᕐᓂᒃ ᐊᕐᕌᒍᑕᒫᑦ, ᐅᑯᓂᖓᐅᓗᐊᖅᑐᖅ ᑐᖏᓕᕇᑦᑐᓂᒃ 50 -ᖏᓐᓃᑦᑐᓂᒃ. ᑲᒪᒋᔭᐅᑦᓯᐊᖁᓪᓗᒍ ᑎᑎᖅᑐᒐᕐᓂᐅᑉ ᐊᖏᓪᓕᕙᓪᓕᐊᑐᐃᓐᓇᕐᓂᖓ, ᕿᑭᕐᑖᓗᒻᒥ ᑯᐊᐸᒃᑯᑦ ᐃᓚᒋᐊᓪᓚᓚᐅᖅᓯᒪᔪᑦ ᑎᑎᖅᑐᒐᕐᕕᒃᓴᓂᒃ ᐃᓪᓗᓂᒃ ᐊᒻᒪ ᐊᖏᕐᕋᒃᓴᒥᒃ.
ᑖᓐᓇ ᓄᑖᖅ ᐊᒻᒪ ᐊᑐᖅᑕᐅᓚᐅᖅᓯᒪᓐᖏᑦᑐᖅ ᓴᖅᑭᑕᐅᓚᐅᖅᓯᒪᔪᖅ - ᓄᓇᓕᓐᓄᑦ ᓇᒻᒥᓂᕆᔭᐅᔪᖅ ᑎᑎᖅᑐᒐᕐᕕᒃ ᐅᑭᐅᖅᑕᖅᑐᒥ— ᑮᓇᐅᔭᓕᐅᕈᑕᐅᓕᖅᑎᓪᓗᒍ ᐊᒻᒪ ᐅᐱᒋᔭᐅᓪᓗᓂ ᑭᓐᖓᕐᒥᐅᓂᑦ, ᐊᑐᐃᓐᓇᕈᖅᑎᑕᐅᓪᓗᓂᓗ ᑎᑎᕋᐅᔭᖅᑎᓄᑦ ᐊᒻᒪ ᐃᓕᖅᑯᓯᖓᓂᒃ ᓴᖅᑭᑎᕆᕙᓪᓕᐊᓂᕐᒧᑦ ᐅᓂᒃᑳᖅᑐᐊᑐᖃᕐᓂᒃ, ᐊᑐᖅᓯᒪᔭᑐᖃᖏᓐᓂᒃ, ᐅᓂᒃᑳᓂᒃ ᐊᒻᒪ ᐅᓂᒃᑳᖅᑐᐊᓂᒃ. ᑭᓐᖓᕐᓂᑦ ᑕᒪᑐᒥᖓ ᑲᔪᓯᑎᑦᓯᓯᒪᑦᓯᐊᕐᓂᖅ ᑲᔪᖏᖅᓱᐃᒋᐊᓪᓚᒍᑕᐅᓯᒪᔪᖅ ᐊᓯᖏᓐᓄᑦ ᐃᓄᓐᓄᑦ ᐅᑭᐅᖅᑕᖅᑐᓕᒫᓂ ᓇᒻᒥᓂᖅ ᓴᖅᑭᑎᕆᓂᒃᑯᑦ ᑎᑎᕋᐅᔭᕐᕕᓐᓂᒃ.
Woman Who Lives in the Sun Ashevak, Kenojuak, 1960, CD 1960-023 ii, Photo © CMC
Woman Who Lives in the Sun Ashevak, Kenojuak, 1960, CD 1960-023 i, Photo © CMC