1990-ᓂ ᓄᑖᓂᒃ ᐱᒋᐊᕐᓂᖃᓚᐅᕐᓂᖅ
My Daughter's First Steps Pootoogook, Napatchie, 1990, CD 1990-009, Photo © CMC
ᐊᕐᕌᒍᓂ ᖁᓕᓂ ᐱᒋᐊᓕᖅᓱᑎᒃ, ᑭᓐᖓᕐᓂᑦ ᑎᑎᖅᑐᒐᕐᕕᒻᒥ ᑐᓐᖓᕕᖃᓕᓚᐅᖅᓯᒪᔪᑦ ᑲᑐᔾᔨᖃᑎᒌᓂᒃ ᐃᓄᑐᖃᐅᓂᖅᓴᓂᒃ ᑎᑎᖅᑐᒐᖅᑎᓂᒃ ᑲᔪᓯᑦᓯᐊᖁᓪᓗᒍ ᑎᑎᖅᑐᒐᕐᓂᖅ. ᐅᑭᐅᖅᑕᖅᑐᒥ ᐆᒪᔪᓐᖑᐊᓂᒃ ᐊᒻᒪ ᐃᓕᖅᑯᓯᖓᒍᑦ ᐱᐅᓯᑐᖃᕕᓂᕐᓂᒃ ᑎᑎᕋᐅᔭᕈᓯᖃᓂᖅ ᐊᑐᖃᑦᑕᓚᐅᖅᑐᑦ, ᐅᑯᐊ ᑎᑎᖅᑐᒐᕐᑕᕕᓂᖏᓐᓂᒃ ᓯᒥᐅᓂ ᖁᑉᐹᐱᒃ, ᑎᑭᑐ ᕿᓐᓄᐊᔪᐊᖅ, ᓇᐸᑦᓯ ᐳᑐᒍᖅ, ᕿᓐᓄᐊᔪᐊᖅ ᐋᓯᕙᒃ, ᐲᑦᑕᓘᓯ ᓴᐃᓚ, ᒥᐊᓕ ᐳᑦᓚᑦ, ᒪᐃᕈᕆᐊᖅ ᐊᓲᓇ ᐊᒻᒪ ᑲᓈᖏᓐᓇᖅ ᐳᑐᒍᖅ. ᐊᓯᖏᑦᑕᐅᖅ, ᓲᕐᓗ ᐸᑦᓗ ᐳᑦᓚᑦ ᑎᑎᕋᐅᔭᖅᑎᐅᑎᓪᓗᒍ ᓄᑖᓂᒃ ᐅᑭᐅᖅᑕᖅᑐᒥ ᐱᐅᓯᐅᕙᓕᖅᑐᓂᒃ, ᐃᓱᓕᑦᓱᒍ 1992-ᒥ ᑐᖁᒻᒪᑦ.
ᐊᓯᔾᔨᖅᑐᐃᕙᓪᓕᐊᓂᕆᓚᐅᖅᑕᖏᑦ. ᐊᐅᑦᓚ ᐳᑦᓚᑦ, ᐊᕐᓇᖅᑯᖅ ᐋᓯᕙᒃ, ᔮᓂ ᐳᑐᒍᖅ ᐊᒻᒪ ᖃᕙᕙᐅᖅ ᒪᓄᒥ ᓴᖅᑭᑎᕆᓚᐅᕐᒪᑕ ᓄᑖᓂᒃ ᑎᑎᖅᑐᒐᕈᓯᕐᓂᒃ, ᐊᒻᒪ ᐊᒥᓱᑦ ᑎᑎᕋᐅᔭᖅᑏᑦ ᐃᓚᐅᓂᖅᓴᐅᓕᖅᓱᑎᒃ ᐊᕐᕌᒍᑦ ᖁᓖᑦ ᐃᓗᐊᓂ. ᒪᕐᕉᒃ ᖃᐅᔨᒪᔭᐅᓂᖃᒻᒪᕆᑦᑑᒃ ᐊᕐᓈᒃ - ᐃᓄᑐᖃᖅ ᓯᐅᕐᔪᒃ ᐃᑎᑦᓗᐃ ᐊᒻᒪ ᒪᒃᑯᑦᑐᖅ ᓱᕕᓇᐃ ᐊᓲᓇ - ᐃᑲᔪᕐᓂᖃᓚᐅᖅᑑᒃ ᓯᕗᓪᓕᖅᐹᒥ ᑎᑎᕋᐅᔭᕐᓂᖏᑎᒍᑦ ᐃᓗᐊᓃᑦᑐᑦᓴᓂᒃ ᑎᑎᖅᑐᒐᕐᕕᐅᑉ 1994-ᒥ ᐊᒻᒪ 1997-ᒥ, ᓴᖅᑭᑎᑦᓯᓪᓗᑎᒃ ᐊᔾᔨᐅᖏᑦᑐᓂᑦᑕᐅᖅ ᐃᓱᒪᒋᔭᒥᓂᒃ ᑭᓐᖓᕐᒥᐅᑦ ᑎᑎᖅᑐᒐᖅᑎᖏᓐᓄᑦ.
Bear's Head Etidlooie, Sheojuk, 1995, CD 1995-032, Photo © CMC
1994-ᒥ ᕿᑭᖅᑖᓘᑉ ᐅᐊᓕᓂᖓᓂ ᐃᓄᐃᑦ ᑯᐊᐸᖓᒍᑦ ᖃᐃᖅᑯᔨᓚᐅᖅᓯᒪᔪᑦ ᑎᑎᖅᑐᒐᕐᓂᒃ ᓴᖅᑭᑎᕆᔨᒻᒪᕆᒻᒥᒃ ᐹᓪ ᒥᑦᔅᓂᒃᒥᒃ, ᒪᓐᑐᕆᐊᓪᒥ ᓴᓇᓐᖑᐊᕐᕕᒻᒦᓐᖔᖅᑐᒥᒃ, ᑭᓐᖓᕐᓂᑦ ᐃᓕᓴᐃᓂᐊᖅᑎᓪᓗᒋᑦ ᓴᕕᕋᔭᒃᑯᑦ ᐃᑎᖅᓴᓕᐅᕐᓂᕐᒥᒃ. ᑕᒪᑐᒥᖓ ᐃᒃᐱᒍᓱᓕᕐᓂᖅ ᓴᕕᕋᔭᒃᑯᑦ ᓴᓇᓐᖑᐊᕐᓂᕐᒥᒃ, ᐊᑐᖅᑕᐅᓚᐅᖅᓯᒪᒍᓐᓇᐃᖅᑐᖅ ᑎᑎᖅᑐᒐᕐᕕᒻᒥ ᐊᕐᕌᒍᑦ ᖁᓕᑲᓴᓐᓂ. ᐃᓚᐅᑎᓪᓗᒋᑦ ᐅᑯᐊ Studio PM, ᑭᓐᖓᕐᓂᑦ ᓴᖅᑭᑎᑦᓯᓚᐅᖅᑐᑦ ᐊᒥᓱᑲᓪᓚᓐᓂᒃ ᐃᑎᖅᑕᓕᐅᖅᓯᒪᔪᑎᒍᑦ ᑎᑎᖅᑐᒐᕐᓂᒃ ᐊᒻᒪ ᐅᑭᑦᑕᓪᓛᑎᕆᓂᖅ ᑭᑦᑐᒐᕐᓂᖅ 1995-ᒥ ᐊᕐᕌᒍᑕᒫᑦ ᑲᑎᖅᓱᖅᑕᐅᔪᑦ, ᐱᐅᓯᑎᑦᓯᒋᐊᓪᓚᒍᑎᓂᒃ ᑎᑎᖅᑐᒐᕐᓂᒃ ᐊᑐᖅᓱᑎᓪᓗ ᐅᑯᓂᖓ ᐅᔭᕋᐅᑉ ᖄᖓᓂᒃ ᑎᑎᖅᑐᒐᕐᓂᖅ, ᑎᑎᖅᑐᒐᕈᑎᓂᒃ ᓇᕿᑦᑕᐅᑎᓂᒃ ᐊᒻᒪ ᑎᑎᖅᑐᒐᕐᕕᒃᓴᓕᐅᕐᓂᒃᑯᑦ ᐊᑐᕐᓂᖅ. ᓴᕕᕋᔭᒃᑯᑦ ᑎᑎᖅᑐᒐᓕᐅᕐᓂᖅ ᐃᑲᔪᕐᓂᖃᓚᐅᖅᑐᖅ ᑲᔪᓯᒋᐊᓪᓚᑎᑦᓯᓂᒃᑯᑦ ᐱᓕᕆᐊᖏᓐᓂᒃ ᐅᑯᐊ, ᓯᐅᕐᔪᒃ ᐃᑎᑦᓗᐃ, ᒥᐊᓕ ᐳᑦᓚᑦ, ᓂᑯᑕᐃ ᒥᐊᓪᔅ ᐊᒻᒪ ᖃᖁᓪᓗ ᓵᒋᐊᖅᑐᖅ.
ᐊᕐᕌᒍᑕᒫᑦ ᑲᑎᖅᓱᐃᓂᖅ ᑎᑎᖅᑐᒐᕐᓂᒃ ᓱᕐᕋᓗᐊᓚᐅᓐᖏᑦᑐᑦ 1990-ᓂ, ᓴᖅᑭᑎᕆᕙᑦᓱᑎᒃ ᓴᓂᐊᓂ 28 ᐊᒻᒪ 35 ᐊᑯᓐᓂᖏᓐᓃᑦᑐᓂᒃ ᑎᑎᖅᑐᒐᕐᓂᒃ ᐊᕐᕌᒍᑕᒫᑦ, (ᐱᖃᓯᐅᑎᓇᒋᑦ ᑎᓕᔭᐅᒍᑎᒋᓯᒪᓪᓗᒋᑦ ᑮᓇᐅᔭᓕᐅᕈᑕᐅᓯᒪᔪᑦ ᑎᑎᕋᐅᔭᖅᑎᑦᓯᓂᒃᑯᑦ). ᐊᕐᕌᒍᓂ ᖁᓕᓂ, ᐅᒃᑯᓯᒃᓴᓂᒃ ᑎᑎᕋᐅᔭᕈᑎᖃᕐᓂᖅ ᐊᒻᒪ ᐊᒥᐊᖅᓯᒪᔪᓂᒃ ᓴᖅᑭᑎᑦᓯᖃᑦᑕᓚᐅᖅᑐᑦ ᐅᑯᐊ ᖃᕙᕙᐅᖅ ᒪᓄᒥ, ᕿᐊᑦᓱᒃ ᓂᕕᐊᖅᓯ, ᐊᐃᐅᓛ ᑭᓐᖑᐊᑦᓯᐊᖅ, ᐲ ᒥᑭᒐᖅ (ᑐᖁᓚᐅᖅᓯᒪᔪᖅ 1996-ᒥ), ᐃᓅᓯᖅ ᐅᑦᑐᕿ ᐊᒻᒪ ᐊᕐᓇᖅᑯ ᐋᓯᕙᒃ, ᐅᑯᐊᓗ ᑎᑎᖅᑐᒐᕐᕕᓕᐅᖅᑏᑦ ᐊᐅᑦᓚ ᐳᑦᓚᑦ, ᐱᑦᓯᐅᓛᖅ ᓂᕕᐊᖅᓯ, ᔮᓂ ᐳᑐᒍᖅ ᐊᒻᒪ ᓂᕕᐊᖅᓯ ᖁᕕᐊᓇᖅᑐᓕᐊᖅ.
Attentive Birds Ashevak, Kenojuak, 1992, CD 1992-022, Photo © CMC
ᐃᒻᒥᑰᖅᑐᓂᒃ ᐊᒻᒪ ᑲᑎᓐᖓᔪᓂᒃ ᑕᑯᒃᓴᐅᑎᑦᓯᓂᖅ ᑲᓇᑕᒥ ᑕᑯᔭᒐᖃᕐᕕᓐᓂ ᑲᔪᓯᒋᐊᓕᓚᐅᖅᓯᒪᔪᖅ 1980-ᖏᓐᓂ, ᐊᒻᒪ ᐅᓄᖅᓯᒋᐊᖅᓱᑎᒃ ᐃᓕᑕᕆᔭᐅᓯᒪᔪᑦ ᐊᒻᒪ ᐅᐱᒋᔭᐅᓯᒪᒻᒪᕆᑦᑐᑦ, ᑲᔪᓯᒋᐊᓪᓚᒍᑕᐅᓪᓗᑎᒃ ᑎᑎᕋᐅᔭᖅᑎᓄᑦ ᓲᕐᓗ ᐅᑯᓄᖓ ᕿᓐᓄᐊᔪᐊᖅ ᐋᓯᕙᒃ, ᐸᑦᓗ ᐳᑦᓚᑦ ᐊᒻᒪ ᓇᐸᑦᓯ ᐳᑐᒍᖅ. ᑭᓯᐊᓂ ᐊᕐᕌᒍᑦ ᖁᓖᑦ ᐊᓂᒍᓕᖅᑎᓪᓗᒋᑦ, ᓯᓚᕐᔪᐊᕐᒥᐅᑦ ᖃᐅᔨᕙᓪᓕᐊᓕᓚᐅᖅᑐᑦ ᒪᒃᑯᑦᑐᓂᒃ ᑎᑎᕋᐅᔭᖅᑎᓂᒃ, ᓲᕐᓗ ᓱᕕᓇᐃ ᐊᓲᓇᒥᒃ ᐊᒻᒪ ᐊᕐᓇᖅᑯ ᐋᓯᕙᒻᒥᒃ. ᐊᕐᕌᒍᑦ ᖁᓖᑦ ᐊᓂᒍᖅᑎᓪᓗᒋᑦ ᓴᖅᑭᑎᕆᓚᐅᖅᑐᑦ ᑲᔪᓯᖏᓐᓇᕐᓂᐊᖅᑐᓂᒃ: 1999-ᒥ ᑭᓐᖓᕐᓂᑦ ᑎᑎᖅᑐᒐᕐᕕᒃ ᐊᓂᒍᐃᓂᖃᓚᐅᕐᒪᑦ 40-ᓂᒃ ᐊᒻᒪ ᑲᓇᑕᐅᑉ ᐅᑭᐅᖅᑕᖅᑐᐊ ᐊᕕᒃᑐᖅᑕᐅᓪᓗᓂ, ᓄᓇᕗᑖᕐᒪᑕ.